ବ୍ୟାଣ୍ଡ, ବାଜା, ବାରାତ (୨)

ଡଃ ବିୟତପ୍ରଜ୍ଞା ଆଚାର୍ଯ୍ୟ
ପ୍ରଫେସର, ବାୟୋକେମିଷ୍ଟ୍ରି
—————————
ଝିଅକୁ ପରୀକ୍ଷା ପରେ ସ୍କୁଲରୁ ଧରି ଫେରିଲା ବେଳକୁ ପଡ଼ିଗଲୁ ଭିଡରେ | ଆଗରେ ଡି.ଜେ. ଗାଡି ଯାଉଛି କର୍ଣ୍ଣଫଟା ଦୁମ ଦୁମ ବାଜା ଓ ଗୀତ ବଜେଇ | ଦିନ ୧:୩୦ରେ ବରଯାତ୍ରୀ ଶୋଭାଯାତ୍ରା ! ଏପଟେ ଭୋକରେ ପେଟ ଜଳୁଛି, ତେଣେ ଡିଜେ ଗାଡି ଯୋଗୁଁ ଟ୍ରାଫିକ ଜାମ I ସେ ଗାଡି ପଛରେ ଠିଆ ହେଲେ ହୃଦରୋଗୀ ଶୀଘ୍ର ଉପରକୁ ଟିକେଟ କାଟି ପାରନ୍ତି I ଛୋଟ ଛୁଆଟିଏର କାନ ପରଦା ଫଟେଇବା ପରି ଶବ୍ଦ କମ୍ପନ ତ ନିଶ୍ଚୟ ହେଉଥାଏ I

ଶୋଭାଯାତ୍ରା ନୁହଁ ତ ପ୍ରହସନ | ବରଯାତ୍ରୀ ଘରର କିଛି ସ୍ତ୍ରୀ ଲୋକ ମୁଣ୍ଡରେ ଓଢଣା ଦେଇ ଚାଲିଛନ୍ତି | ବରପିଲାର ସାଙ୍ଗ ସୁଙ୍ଗା ନ ଥାନ୍ତି ବୋଧହୁଏ ନାଚିବା ପାଇଁ | ଥିଲେ ବି ଦେଢ଼ଟା ବେଳର ଜଳାପୋଡ଼ା ଗରମରେ କିଏ ନାଚିବ ନା ଡେଇଁବ ? ଯା’ ହେଉ ସ୍କୁଟି ଧରିଥିଲି ବୋଲି କଟେଇ କାଟେଇ ଆସିଗଲି |

ଆଉ ଟିକିଏ ଅଗରେ ଆଉ ଗୋଟିଏ ଶୋଭାଯାତ୍ରା | ଏଥରକ କିଛି ଯୁବତୀ ଚାଲୁଥିବାର ଦିଶିଲେ | ସେମାନେ ମଝି ମଝିରେ ହାତ ଟେକି ନାଚିଲା ପରି ଦିଶୁଥାନ୍ତି | ଆଉ କିଛି ସମୟ ଅନୁଧ୍ୟାନ କଲାପରେ ସେ ତିନି ଜଣ ରୁ ଜଣେ ମୁଣ୍ଡ ବୁଲାଉଛି ବୋଲି ଜଣା ପଡିଲା ଓ ସେ A.C. କାର ମଧ୍ୟକୁ ପ୍ରବେଶିଲା | D.J. ତା’ ବାଟେ ବାଜୁଥାଏ …ଆଗରେ ପୁଣି ଶଙ୍ଖ ମହୁରୀ ମଧ୍ୟ ବଜେଇ ଆଉ ଦଳେ କଳାକାର ଯାଉଥାନ୍ତି |
ହାଏ ! ଆମ ଯୁବାବର୍ଗ ! ଏ.ସି. କି କାଳ ହେଲାରେ ! ନା ବ୍ୟାୟାମ କ’ଣ ଜାଣୁଛନ୍ତି , ନା ପାଦେ ଚାଲୁଛନ୍ତି |
ଏ.ସି., ହିଟରର କୃତ୍ରିମ ପରିବେଶ ଗଢି ତା’ରି ଭିତରେ ଖାଲି ବହିଚାଷ ନ ହେଲେ ମୋବାଇଲ ଧରି ମନ ତୋଷ |
DJ ରେ ଆପାତତଃ ୨୦-୩୦ହଜାର ଟଙ୍କା ତ ଖର୍ଚ୍ଚ ହୋଇଥିବ | କିଏ ଶୁଣିଲା ନା କିଏ ନାଚିଲା! ଲୋକଦେଖାଣିଆ ଖର୍ଚ୍ଚଟିଏ କିନ୍ତୁ ହେଲା | ଭାବନ୍ତୁନି ଯେ, ସନ୍ଧ୍ୟାବେଳେ କିଛି ଅଧିକ ଲୋକ ନାଚୁଥିବେ I
ଯୁବାବର୍ଗର ଏତାଦୃଶ ବିକଳ ଅବସ୍ଥା ଦେଖି ମୁଁ ବନ୍ଧୁ ମହଲରେ କହିଲି – “ଆଃ!, ସତେ ଯଦି କେହି ଏକ କମ୍ପାନୀ ଖୋଲନ୍ତା , ଯେଉଁଥିରେ କିଛି ଯୁବା ନର୍ତ୍ତକ, ନର୍ତ୍ତକୀ DJ ପଛରେ ନାଚି ନାଚି ଯା’ନ୍ତେ , ଲୋକ ସେତକ ବାବଦକୁ ମଧ୍ୟ ଭଡା ଗଣିବାକୁ ପଛାନ୍ତେନି ପରା !”
ଶୁଣୁ ଶୁଶୁ ଜଣେ ବାନ୍ଧବୀ କହିଲେ – “ଆଉ କ’ଣ ବାକି ଅଛି ! ଏମିତି ଭଡାଟିଆ ନର୍ତ୍ତକ କମ୍ପାନୀ ଗଢି ଉଠିଲାଣି ନା | ଭଡାରେ ଆସି ଭଲ ବେଶ ପୋଷାକ ପିନ୍ଧି ନାଚିବେ, ଭୋଜି ଭାତ ଖାଇ ବିଦା ହେବେ I”
ଯାହା ଆଗରୁ ବନ୍ଧୁ ବାନ୍ଧବ , ସାଙ୍ଗମାନେ ଖୁସିରେ କରୁଥିଲେ, ସେତକ କରିବାକୁ ଖୋସାମତ, ମଦ ଯଚା ଆଦି ଚାଲିଲା |ଏବେ ସେତକ ମଧ୍ୟ କରିବାକୁ କେହି ରାଜି ନାହାନ୍ତି | ସମସ୍ତେ ମାତ୍ରାଧିକ ବ୍ୟସ୍ତ ନିଜ ନିଜ ଜୀବନରେ , ନ ହେଲେ ଏ.ସି. ପରିବେଶରେ ରହି ରହି ବାହାରକୁ ବାହାରିବାର କିମ୍ବା ଗରମ ସମ୍ଭାଳିବାର ଅଭ୍ୟାସ ନାହିଁ | ବାଃ ବାଃ ରେ ବ୍ୟାଣ୍ଡ , ବାଜା , ବାରାତ !
ସତରେ କ’ଣ ଦରକାର ଏ ସବୁ ପ୍ରହସନର ! ଯେ ଯାଏଁ ବନ୍ଧୁ କୁଟୁମ୍ବ ନିଜ ଆଡୁ ଅନୁରୋଧ ନ କରିଛନ୍ତି କିମ୍ବା ଆପଣ ଶତ ପ୍ରତିଶତ ସଠିକ ଜାଣିଛନ୍ତି ଯେ ଆପଣଙ୍କ ଶୁଭେଚ୍ଛୁମାନଙ୍କ ସଂଖ୍ୟା ବେଶ ଅଧିକ, ସେ ଯାଏଁ ଏ ଭଳି ଶବ୍ଦ ପ୍ରଦୂଷଣକାରୀ DJ ଆଦିରେ ଅର୍ଥ ଶ୍ରାଦ୍ଧ କରିବା ଅନାବଶ୍ୟକ I ଶୁଭ କାର୍ଯ୍ୟରେ ମଙ୍ଗଳ ବାଦ୍ୟ ବଜେଇବାର ପ୍ରଥା ରହିଛି I ବରଂ ଶଙ୍ଖ ମହୁରୀ କଳାକାରମାନଙ୍କୁ ସମ୍ମାନର ସହ ଏଥିରେ ସାମିଲ କରାନ୍ତୁ ଭଲ ଦରଦାମରେ I ସେ ମଧ୍ୟ ବାହାଘର ସ୍ଥଳୀର ଦ୍ୱାର ମୁହଁରୁ …ଯଦ୍ଦ୍ଵାରା ଅଯଥା ରାସ୍ତା ଜାମ ହେବ ନାହିଁ କିମ୍ବା ଡିଜେ ଜନିତ ଯାନ୍ତ୍ରିକ ଶବ୍ଦ ପ୍ରଦୂଷଣ ହେବ ନାହିଁ I
llଶୁଭମସ୍ତୁ II
*************